អន្តរជាតិ៖ ការដឹកជញ្ជូនលើកដំបូងនៃកញ្ចប់ជំនួយផ្នែកសន្តិសុខដែលមានតម្លៃស្មើរ ២០០លានដុល្លាររបស់សហរដ្ឋអាមេរិកសម្រាប់អ៊ុយក្រែនបានមកដល់ទីក្រុងគៀវហើយ នេះបើតាមស្ថានទូតអាមេរិកបានប្រកាសនៅថ្ងៃសៅរ៍ទី ២២ ខែមករា។

ជំនួយនេះបានធ្វើឡើងបន្ទាប់ពីដំណើរទស្សនកិច្ចរបស់រដ្ឋមន្ត្រីការបរទេសអាមេរិកលោក Antony Blinken ទៅកាន់ទីក្រុងគៀវក្នុងសប្តាហ៍នេះ ចំពេលមានការព្រួយបារម្ភពីវត្តមានទាហានរុស្ស៊ីរាប់ម៉ឺននាក់ដែលបានប្រមូលផ្តុំនៅព្រំដែនជាមួយអ៊ុយក្រែន។

ឆ្លើយតបនឹងរឿងនេះទីក្រុងវ៉ាស៊ីនតោនបានអនុម័តកញ្ចប់ថវិកា២០០លានដុល្លារកាលពីខែធ្នូដើម្បីផ្តល់ជំនួយ។

សហរដ្ឋអាមេរិកនឹងបន្តផ្តល់ជំនួយដើម្បីគាំទ្រដល់កងកម្លាំងប្រដាប់អាវុធរបស់អ៊ុយក្រែនក្នុងកិច្ចខិតខំប្រឹងប្រែងបន្តរបស់ពួកគេដើម្បីការពារអធិបតេយ្យភាព និងបូរណភាពទឹកដីរបស់អ៊ុយក្រែនប្រឆាំងនឹងការឈ្លានពានរបស់រុស្ស៊ី។ រដ្ឋមន្ត្រីការពារជាតិអ៊ុយក្រែនបានថ្លែងអំណរគុណដល់សហរដ្ឋអាមេរិកសម្រាប់ជំនួយនេះផងដែរ៕